БИШКЕК, 23-апр. — Sputnik. Кыргызстанда мектеп бүтүрүүчүлөрү үчүн түзүлгөн жалпы республикалык тестирлөө (ЖРТ) программасы өзгөрбөйт. Бул тууралуу билим берүү жана илим министринин орун басары Надира Жусупбекова билдирди.
Белгилей кетсек, Казакстанда Бирдиктүү улуттук тестирлөөнүн программасынан 11-класстын IV чейрегинин суроолору алып салынган. Буга окуучулар аралыктан окуп жакшы даярдана албагандыктан ата-энелердин тынчсызданганы себеп болгон.
Жусупбекова Казакстандын тестирлөө программасы Кыргызстандын ЖРТсынан айырмалана турганын белгиледи.
“Биздин тестирлөө ой-жүгүртүүнүн көндүмдөрүнө негизделип, жогорку окуу жайларда окуу мүмкүнчүлүгүн текшерет. Балдар окуу мезгилинде бир гана билим албай, талдоо, түшүнүү, салыштыруу сыяктуу өз алдынча ой-жүгүртүүсүн өнүктүрөт”, — деди ал.
Аны менен катар эле Жусупбекова 11-класстын окуучуларына телесабактан сырткары кошумча дагы ЖРТга даярдыктар көрсөтүлүп, ошондой эле электрондук ресурстар дагы бар экенин кошумчалады. Ошондой эле ал быйыл тестирлөөнүн убактысы жылдырылганын айтат.
Соңунда ал окуучулар жакшы даярданып, кайталашы үчүн шарттар түзүлөрүн белгиледи. Кандайдыр бир жеңилдиктерди кароого негиз жок деп эсептейт.
Эскерте кетсек, өлкөдөгү кырдаалдан улам мектеп окуучулары аралыктан окууга өткөн.
