БИШКЕК, 14-апр. — Sputnik. Жалпы республикалык тестирлөөгө даярдануу сабактары ЭлТРдин "Билим жана Илим" каналынан эфирге бериле баштады. Бул тууралуу Билим берүү жана илим министрлигинин маалымат кызматы кабарлады.
Ага ылайык, видеосабактар "Билимди баалоо жана окутуу усулдары" борбору тарабынан даярдалган.
"Атайын видеосабактар дүйшөмбүдөн ишембиге чейин бир күндө эки ирет эфирге коюлуп жатат. Аны бүтүрүүчүлөр эртең мененки саат 8:05тен 8:45ке чейин жана 17:55тен 18:40га чейин көрө алышат", — деп айтылат маалыматта.
Ушул эле видеосабактар "Билимди баалоо жана окутуу усулдары" борборунун сайтына да жайгаштырылган.
Эске салсак, өлкөдө коронавируска байланыштуу кырдаалдан улам ЖРТны өткөрүү мөөнөтү жылдырылган.
