БИШКЕК, 15-апр. — Sputnik. Жалал-Абад облусунда эпидемиологиялык абал турукташа баштады. Бул туурасында биринчи вице-премьер Кубатбек Боронов парламенттин жалпы жыйынында билдирди.
Анын айтымында, учурда коронавирус аныкталган адамдардын 164ү чет өлкөдөн жуктуруп келген. Өзгөчө абалдын кириши менен үч жумада вирустун андан ары жайылышына бөгөт коюуга мүмкүнчүлүк болду. Эми ооруну чектөөнүн экинчи этабы башталды.
“Азыр Жалал-Абадда кырдаал жеңилдеп, оорукагандардын саны азайды. Ал жактагыларды чектөөгө алууга жетиштик. Ош менен Бишкекте абал бир аз кыйыныраак болуп жатат. Бул аймактарды дагы чектеп алсак, кырдаалдын өнүгүшүнө жараша керектүү тармактардын ишин акырын жандантабыз. Ооба, жашоо уланышы керек, 20 күндөн бери иш токтоп калды. Учурда бир нече тармактардын ишине уруксат берүүнү карап жатабыз”, — деди Боронов.
Белгилей кетсек, Жалал-Абад облусунун 98 тургуну COVID-19 жуктурганы аныкталган. Ал эми Ошто 201, Бишкек менен Чүйдө 110 учур катталган.
Бишкек, Ош, Жалал-Абад шаарлары жана Сузак, Ноокат, Кара-Суу райондоруна 25-мартта киргизилген өзгөчө абал режиминин мөөнөтү 30-апрелге чейин узарып, ага Нарын шаары менен Ат-Башы району кошулду.
Өлкөдө учурда абал кандай болуп жатканын Sputnik Кыргызстан агенттиги жүргүзгөн тексттик трансляциядан билүүгө болот.
Кабарларды ыкчам, ыңгайлуу шартта окуу үчүн Telegram-каналыбызга баш багыңыз.
