БИШКЕК, 10-апр. — Sputnik. Казакстандын бийлиги өзгөчө абал режимин апрелдин аягына чейин узартуу чечимин кабыл алды. Бул тууралуу Sputnik Казакстан жазды.
Маалыматка караганда, 10-апрель күнү президент Касым-Жомарт Токаевдин төрагалыгы астында өзгөчө абал режими боюнча Мамлекеттик комиссиянын онлайн-жыйыны болуп өттү.
"15-апрелде өзгөчө абал киргизүү боюнча Жарлыгым аягына чыгат. Бирок учурдагы абалыбыз режимди жок дегенде апрелдин аягына чейин узартуу керектигин көрсөтүп турат. Мындан тышкары, Нур-Султан, Алматы, Шымкент шаарларында жана бир катар облустарда карантин уланат. Элдин сыртка чыккысы келип турганын жакшы түшүнөм, бирок азыркы шартта обочолонуудан башка арга жок", — деди Токаев.
Президент белгилегендей, Казакстанда коронавирус эпидемиясы басаңдай элек.
Акыркы маалыматтар боюнча, Казакстанда 802 адамдан коронавирус табылган, алардын 60ы сакайып кетти. Ал эми тогуз киши көз жумду.
