БИШКЕК, 4-фев. — Sputnik. Өзгөн районундагы жол кырсыгынан каза болгон жети адамдын аты-жөнү аныкталып, андан соң жерге берилди. Бул туурасында облустук милициянын маалымат кызматынан билдирди.
Милиция маркумдардын улуусу 46 жашта болсо, кичүүсү 27 жашта экендигин айтты.
2 Бирдин айы 2020, 15:35
Кечээ таңда Өзгөн районунун Мырзаке айылында Lexus ES300 унаасынын айдоочусу рулду башкара албай электр мамычасын сүзүп, өрт чыккан. Автоунаада бараткан жети эркек кишинин бири да аман калган эмес.
Алар 2-февраль күнү Большевик айылынан Өзгөн шаарына улакка баруу үчүн коомдук транспорт менен кетип, үйлөрүнө кайтып бара жатканда кырсыкка учурашкан.
Бүгүн, 4-февраль күнү, маркумдардын сөөгү өздөрү жашаган Большевик айылында жерге берилди. Акыркы сапарга узатуу Садык Эшматов орто мектебинин короосунда өткөрүлдү.
Тажияга жергиликтүү бийлик жана каза болгондордун жакындары менен айылдаштары катышты.
