Оторов: учурда Бишкекте 454 жол кайгуул кызматкери иштеп жатат
Жылдын аягына чейин Кайгуул милиция кызматы өлкөнүн бир катар шаарларында иштеп баштайт. Бул тууралуу Тилек Оторов Sputnik Кыргызстан радиосуна маек куруп жатып билдирди.
Анын айтымында, буга чейин аталган кызматка кабыл алуу үчүн 871 орунга сынак жарыяланып, андан өткөн 454 кызматкер Бишкек шаарында иштей баштаган.
"2019-жылы жылдын жаз айларында Кайгуул милиция башкармалыгын түзүү боюнча иштер башталып, ага иштегиси келген бардык каалоочуларга сынак жарыяланган. Учурда биринчи этабынан өткөн 454 кызматкер Бишкекте иш алып барууда. Мындан тышкары, жүздөн ашык бош орунга конкурс жарыяланып, документ кабыл алуу иштери жүрүп жатат. Каалоочулар борбор калаабыздагы Чокан Валиханов көчөсү - 1А дарегинде жайгашкан ЖКККББнын кадрлар бөлүмүнө кайрылса болот. Талап боюнча медкомиссиядан, билим деңгээли боюнча тесттен, дене тарбия даярдыгын текшерген сынактан жана атайын маектешүүдөн өтөт. Ошондой эле жыл аягына чейин өлкөнүн бардык шаарларында Кайгуул милиция кызматын ишке киргизүү пландалууда. Алсак, 2020-жылдын биринчи жарымында Ош, Баткен, Кызыл-Кыя, Жалал-Абад, Каракол, Балыкчы, Чолпон-Ата шаарларында жана Чүй облусунун кээ бир аймактарында ишке ашырылат. Ошол эле жылдын экинчи жарымында Токмок, Кара-Балта, Нарын, Талас, Кара-Суу, Өзгөн, Ноокатта уюштуруу иштери жүрөт", — деди Оторов.
Ал ошондой эле сынактан өткөндөр ИИМ академиясынын атайын даярдалган үч айлык курсунан окуп чыгышарын кошумчалады.
