БИШКЕК, 14-янв. — Sputnik. Ливияда азыр мамлекеттүүлүк жок, аны НАТО 2011-жылы жок кылган. Бул тууралуу Россиянын тышкы иштер министри Сергей Лавров ливиялык кесиптеши Динеш Гунадеварден менен болгон жолугушуудан кийин уюштурулган маалымат жыйында билдирди.
"Бул кылмыштуу, мыйзамсыз авантюралык кадамдын кесепетин азыркыга чейин тартып жатабыз. Биринчи кезекте ливиялыктар жапа чегүүдө", — деди министр.
Лавров НАТО жараткан көйгөйдү чечүү боюнча Германия, Франция, Италия, Алжир, Египет, БАЭ, Түркия, Катар жана Россия мамлекеттери иштеп жатканын белгиледи.
Кечээ Москвада Ливия боюнча сүйлөшүүлөр өттү. Тараптар аймактагы чыңалган абалдан чыгуунун жолдорун, мүмкүнчүлүктөрдү талкуулап, бирок бир пикирге келе алышкан жок. Элдешүү боюнча документке Ливиянын улуттук армиясынын башчысы маршал Халифа Хафтар кол коюудан баш тарткан.
Ливиядагы кырдаал
2011-жылы АКШ менен НАТО башында турган эл аралык коалиция Ливияда операция жүргүзгөн. Натыйжада Муамар Каддафи өлтүрүлүп, 40 жылдан бери өкүм сүрүп келе жаткан режим кулаган.
Кош бийлик жана коопсуздук системасындагы кыйроолор куралданган көтөрүлүшчүлөр менен террордук уюмдардын активдүүлүгүн арттырды. Борборлоштурулган бийликтин жана бирдиктүү армиянын жогунан Ливия контрабанданын чордонуна, Африкадан Европага мыйзамсыз агылган мигранттар үчүн өткөрүүчү жайга айланып калды.
2019-жылдын 4-апрелинде Хафтар "террорчулардан бошотуу" үчүн Триполиге чабуул жасайт. Ал эми өкмөткө караштуу куралдуу түзүлүштөр жооп кайтарышкан. Натыйжада бир нече ай ичинде жүздөгөн киши каза таап, миңдеген адам жарадар болгон.
