Давлетова: ысык температура териге зыян
Кышында сыртка чыгаарда бетке сөзсүз крем сүйкөп чыгуу зарыл. Ал коргоочу катмар болуп терини бырыш басуудан, түлөөдөн жана купероз оорусунан сактайт. Бул тууралуу Мээрим Давлетова Sputnik Кыргызстан радиосуна маек куруп жатып билдирди.
Анын айтымында, өлкөбүз тоолуу, климаты кургак болгондуктан бетке нымдаштыруучу маска жасап, витаминдерди алып туруу керек.
"Негизи муздак аба териге абдан пайдалуу экен. 2017-жылы Кореяга окууга барганда мончо териге пайдалуубу же зыянбы деп сураганда, мен аябай жакшы деп мактап айтып жатсам, окутуучу "жок, сиз туура эмес айттыңыз" деди. Көрсө тери ысыкта чоюлуп, губка сымал сууну соруп, анан шишийт экен. Шишик тарагандан кийин тери шалбырап, андан да жаманы баягы безеткилер да ушундан көбөйөт экен. Мен болбой эле биз мончого түшүп эле жүрөбүз деп талашсам, ошондо окутуучу: "Адам эмне жесе ошондон турат, эми айтыңызчы, тамакты ысыкка койсок көпкө сакталабы же муздак жерге койсокпу", - деген суроо бергенде мен унчуга албай калдым. Көп жылдык изилдөөлөргө караганда, узак убакыт муздак аймакта жашаган адамдын бетинде жаш коллаген сакталып калат экен. Эгер муздак температурада бетке туура кам көрсөң, жаштыгың, сулуулугуң көпкө чейин сакталат", — деди Давлетова.
Косметолог бетти макияждан жакшылап тазалабаса тери бат картайып, безетки, пиодермия сыяктуу оорулар менен жабыркай турганын кошумчалады.
