БИШКЕК, 27-окт. — Sputnik. Дүйнөнүн эң ири аэропорту болуп саналган Кытайдын Пекининдеги "Дасин" аэропорту бүгүн таңда алгачкы эл аралык каттамын ишке ашырганын РИА Новости жазды.
Биринчи учак Бангкокко сапар алган. Самолёт абага жергиликтүү убакыт боюнча саат 7.50дө (Бишкек убактысы боюнча 5.50) көтөрүлгөн.
Аба майдан Пекинден түштүктү көздөй 46 чакырым алыстыкта жайгашкан. Төрт учуп-конуу тилкеси бар аэропорт жылына 620 каттамды кабыл алууга жөндөмдүү. Долбоорго ылайык, 2025-жылга карата 72 миллион адамды тейлөөгө даяр болуп, жыл сайын эки миллион тонна жүктү иштете алмакчы.
"Дасин" терминалынын инженердик долбоору өтө татаал аэропорт болуп саналат. Анын чатыры дүйнөдөгү эң ири чатыр деп табылып, 25 футбол талаасынын аянтына барабар экени белгилүү.
