Асанбаева: аймактардагы медиа борборлорго жаңы кызматтар кошулат
Ар бир жети облустагы медиа борбордун өзүнүн юристи жана гримеру болот. Мындай штаттык бирдиктер жаңыдан киргизилип жатат. Бул тууралуу Айнура Асанбаева Sputnik Кыргызстан радиосунун таңкы эфиринде маек куруп жатып билдирди.
Анын айтымында, буга чейин министрликке караган облустардагы ЖМКларда юристтер жок болгондуктан, соттук иштерде борбордон чакыртууга туура келчү.
"Жети облуста ачылып жаткан медиа борборлор облустук телеканалдын базасында түзүлгөндүктөн, телевидениенин директору автоматтык түрдө медиа борбордун башчысы болуп кала берет. Мөөнөтү бүткөн учурда жетекчини жана орун басарын дайындоо мурдагыдай эле министрликке жүктөлөт. Калган кызматкерлерди мыйзамдын чегинде жетекчи өзү ишке алат. Мындан сырткары, медиа борбордо юрист жана гример деген жаңы орундар ачылат. Алар бир облуста 2-3төн болгон гезиттерди кыскартуудан калган каражаттын эсебинен ачылып жатат", — деди Асанбаева.
Ал ошондой эле буга чейин аймактагы журналисттердин негизги айлыгы 4000-5000 сом болсо, эми медиа борбордун кызматкерлеринин маянасынын оклады 9200 сомго жогоруларын кошумчалады.
