Мыкты кадр тартуу үчүн сөзсүз кымбат фотоаппарат болуш керек деген ой жаңылыштык. Мындай пикирин Табылды Кадырбеков Sputnik Кыргызстан радиосунун "Ачык кеп" программасында маек куруп жатып билдирди.
Анын айтымында, телефондун камерасы менен деле кооз кадр алууга болот.
"Бүгүнкү күндө өлкөбүздө санариптик сүрөттөр өнүгүү жолунда. Бул нерсеге Instagram тармагынын кеңири жайылышы да түрткү берди. Чөнтөк телефондор үчүн да ар түрлүү объективдерди колдонууга мүмкүнчүлүк жаралды. Жада калса, эл аралык сүрөт конкурстарда атайын мобилдик сүрөт категориялары ачылып, телефонго тартылган сүрөттөргө өзүнчө баа берилип келет. Көпчүлүк жакшы кадр алуу үчүн сөзсүз түрдө кымбат фотоаппарат болуш керек деп ойлойт. Бирок мыкты сүрөттөрдү деле телефондун камерасына тартса болот. Анын үстүнө барган сайын телефондун камералары күчтүү болуп бара жатат. Ал эми мен үчүн сүрөт тартууда жарык өзгөчө мааниге ээ", — деди фотограф.
Ал телефонго салыштырмалуу фотоаппарат менен сүрөт тартуу кыйыныраак экенин кошумчалады.
