БИШКЕК, 8-авг. — Sputnik. 7-августта УКМК мурдагы президент Алмазбек Атамбаевдин Кой-Таштагы үйүн басып кирген. Спецназ үйгө кирип келгенден кийин уюлдук байланыш үзгүлтүккө учурай баштаган. Бир аздан кийин байланыш таптакыр эле жоголгон. Биздин кабарчыбыз байланыш жоголгон учурда Атамбаевдин үйү тарапта эмне болгонун айтып берди. Окуялардын хронологиясы болжолдуу гана экенин эскертебиз.
Саат 21:30. Атамбаевдин тарапташтары үйгө жакындап келип, дубалды кулатып, үйдүн короосуна кирүүгө аракет кылышты.
Саат 22:00. Топтошкон кишилер үйгө кирип келип ал жактагы спецназдын аскерлеринин курал-жарактарын алып сыртка чыгарышты. Айрымдары жаракат алышты. Эл аларга кол көтөрбөшү үчүн алардын камуфляжын чечишкен.
Саат 22:40. 150-200 киши үйгө чогулду. Арасында Асел Кодуранова менен Фарид Ниязов да болду.
Акыркы маалымат боюнча, 43 киши жаракат алып, спецназдын бир жоокери каза болду. Ок анын төш тарабына тийип, артынан чыгып кеткен.
