Коомдо "соцтармак аферисттери" деген жаңы түшүнүк пайда болду. Алар көбүнесе финансылык көз боёмочулуктарды ишке ашырганга далалаттанышат. Бул тууралуу Сейтек Курманов Sputnik Кыргызстан радиосунун эфиринде маек куруп жатып билдирди.
Анын айтымында, интернет аркылуу кат жазып, акча сурап жаткан адам жакын тааныш болсо да ага телефон чалып маалыматты тактап алыш керек.
"Адатта социалдык тармактардагы алдамчылар сиздин жакыныңыздын аккаунтун бузуп кирип, анын жеке кат куржунунан жазып, акча суроодон кайра тартышпайт. Алар көбүнесе кандайдыр бир форс-мажор окуяларды ойлоп табышат. Ошентсе да сиз акча берүүгө ашыкпай, ага телефон чалып сүйлөшүңүз. Эгер номерин билбесеңиз өзүнүн телефон номерин калтыруусун өтүнүңүз. Ошондой эле интернет аркылуу өткөрүлүп жаткан ар кандай утуштарга, акчалай сыйлыктарга ишенбеңиз. Мындай ыкма менен алдамчылар сиздин аккаунтуңуздун сыр сөзүнө жана башка маалыматтарыңызга ээ болгусу келип жатышы толук ыктымал. Эгер андай конкурстарга аккаунтуңуз аркылуу катталсаңыз, алдамчылар сиздин өздүк маалыматтарыңызды көчүрүп алып, компьютериңизди аралыктан башкаруу мүмкүнчүлүгүнө ээ болушат", — деди Курманов.
Ал ошондой эле коопсуздук үчүн сыр сөздү тамга, сан аралаштырып 10 белгиден кем эмес кылууну жана бат-бат алмаштырып туруу керектигин кошумчалады.
