Достук кечесине Россия президенти Владимир Путин, Өзбекстандын башчысы Шавкат Мирзиёев, Афганистандын өкмөт башчысы Абдулло Абдулло, Казакстандын президенти Касым-Жомарт Токаев жана башка меймандар катышкан. Кыргызстандын президенти Сооронбай Жээнбеков Душанбе шаарына бул кеченин эртеси баргандыктан, ага катыша албай калган.
Facebook баракчасына жарыяланган видеодо көрүнүп тургандай, Эмомали Рахмон кесиптештерине резиденциясын көрсөтүп чыккан. Хан сарай тоонун боорунда, шар аккан суунун боюнда жайгашкан. Тажик президенти саммитке келген меймандарды тажик маданияты, тарыхы жана меймандостуктун мыкты салты менен тааныштырган. Кечеде кол өнөрчүлөрдүн эмгектери коюлган көргөзмөлөр уюштурулган. Коноктор Тажикстанда өстүрүлгөн коон, дарбыз, шабдалы, өрүк, алма жана башка мөмө-жемиштерди даамдап көрүшкөн. Меймандарды тажиктердин улуттук тамак-ашы да көңүл кош калтырган эмес.
Азия аймагында өз ара ишеним чараларын чыңдоо кеңешмесинин 5-саммити Душанбе шаарында өтүүдө. Аталган уюмга 27 мамлекет мүчө.
