БИШКЕК, 8-июн. — Sputnik. Си Цзиньпиндин китеби — дүйнөдөгү окурмандар үчүн Кытайдын мамлекеттик саясатын тереңирээк түшүнүүгө болгон көпүрө. Бул тууралуу президент Сооронбай Жээнбеков Кытай лидеринин кыргыз тилинде басылган "Мамлекеттик башкаруу жөнүндө" китебинин бет ачарында айтты.
Өлкө башчынын маалымат кызматынын билдиргенине караганда, салтанат 8-июнь күнү өттү.
Жээнбеков бир жумадан кийин Си Цзиньпин Кыргызстанга мамлекеттик сапары менен келе турганын эске салды.
"Бул визит кыргыз-кытай мамилелеринин жаӊы тарыхый барагын ачат. Өз ара алакабыз жогорку сапаттуу деӊгээлге көтөрүлүп, стратегиялык өнөктөштүктү тереӊдетүү этабына өтөбүз. Саясий, маданий, философиялык мааниси терең жана глобалдуу маселелерди камтыган бул китеп биздин коомго беш жыл мурда орус тилинде белгилүү болгон. Эми кыргыз тилдүү жарандарыбыз да бул уникалдуу китепти окуй алышат. Китепти кыргыз тилине которуп, кыргыз окурмандарына жеткирген "Роза Отунбаеванын демилгеси" фондусуна, анын төрайымы, экс-президент Роза Исаковна Отунбаевага чоң ыраазылык билдирем", — деди Жээнбеков.
Муну менен бирге өлкө башчы кылым карыткан кыргыз-кытай достугу жана коӊшулук мамилеси дагы тереӊдей берерине ишеним артты.
