БИШКЕК, 8-май — Sputnik. Апрель айында Кыргызстандын алтын валюта резерви 17 миллион долларга азайган. Бул тууралуу Улуттук банктын сайтында маалымдалат.
Өлкөнүн башкы финансы көзөмөлдөө органы өткөн айда сомду кармап туруу үчүн валюта рыногуна 22,8 миллион доллар саткан.
Март айынын аягында алтын валюта резерви 2 миллиард 197 миллион 150 миң доллар деп бааланган. Бир айдан кийин ал 2 миллиард 180 миллион 90 миң долларды түзгөн.
Кыргызстандын эл аралык резерви валютанын 10 түрүнөн жана алтындан турат. Алар эл аралык эсептешүүдө, дефицитти жабууда жана улуттук валютанын курсун турукташтырууда колдонулат.
