БИШКЕК, 2-май. — Sputnik. Татарстандын борбору Казань шаарында өткөн Мусулман киносунун эл аралык кинофестивалында Кыргызстандан барган бир тасма баш байгеге, дагы бир фильм атайын сыйлыкка татыганын Кинематографияны колдоо фондусунан билдиришти.
Маалыматка ылайык, 26-апрелде башталган кинофестиваль 4-майда жыйынтыкталмакчы.
"Дарак ыры" сынактын баш байгесине татып, россиялык кинотаануучулар менен киносынчыларынын "Белый слон" сыйлыгына ээ болду. Ал эми "Мугалим" фильми мыкты кыска метраждуу тасмасы деп таанылды", — деп айтылат билдирүүдө.
Аталган кинофестиаль быйыл 15-жолу өтүп жатат.
Белгилей кетсек, буга чейин "Дарак ыры" Кыргызстандын "Ак илбирс" улуттук киносыйлыгынын бир нече номинациясы боюнча жеңишке жеткен.
