БИШКЕК, 12-мар. — Sputnik. "Штраф Инфо KG" деп аталган мобилдик тиркемеден табылган кемчилик жоюлду. Бул туурасында Жол кыймылынын коопсуздугун камсыздоо боюнча башкы башкармалыктан кабарлашты.
Ведомстводон акыркы күндөрү Кыргызстандагы жаңылык сайттар менен социалдык тармактарда айдоочулардын жол эрежесин бузгандыгы боюнча маалымат берген тиркеменин туура эмес иштеп жатканы жарыяланган.
"Инфоком" системасынын бардык серверлеринин ишинде кемчилик жок, адистер жагдайды көзөмөлдөп турганы айтылган.
Жол эрежесин бузганы боюнча айыптарды Каттоо кызматтын portal.srs.kg деп аталган порталынан табууга болот.
ЖКККББдан IT-компаниясынын иштеп чыгуучулары кемчиликти четтетип жана келтирилген оңтойсуздуктар үчүн кечирим сураган.
"Коопсуз шаар" долбоору 12-февралда ишке кирген. Жол эрежесин бузгандарды сүрөткө, видеого тартып, жазып калуу үчүн Бишкектин көчөлөрүнүн 10 кесилишине жана шаар сыртындагы 17 жерге камера орнотулган. Эреже бузган айдоочуларга айып каттары келе баштады. Бүгүн, 12-мартта, Бишкектин тогуз жеринде камера иштеп баштамак. Бирок техникалык себептерден улам аларды ишке киргизүүнү кийинки мөөнөткө калтырышты.
