Жаңы кодекстердин ишке кириши менен караңгылатылган автоунааларды тескөө Транспорт жана жолдор министрлигинин алдындагы Автотранспорт агенттигине өтүп калган. Бул мыйзам жакында Жогорку Кеңеште каралып, кайрадан ЖККББга кайтарылат. Мындай маалыматты Тилек Оторов Sputnik Кыргызстан радиосунун эфиринде маек куруп жатып билдирди.
Анын айтымында, эгер айдоочу алдыңкы эшиктеринин жана маңдайкы терезесин караңгылатып алса, 3000 сом айып пул төлөйт.
"Жаңы кабыл алынган мыйзамдар боюнча автоунаанын терезелерин караңгылатып айдаган айдоочуларды тескөө Автотранспорт агенттигине карап калган. Бирок бул терезелерди караңгылата берсе болот дегенди билдирбейт. Мындай көрүнүш мыйзам бузуу болуп саналат. Мурдагыдай эле жол коопсуздугун камсыздаган инспектор айдоочуну токтотуп, ал эми тескөө иштерин Транспорт жана жолдор министрлигинин алдындагы Автотранспорт агенттиги жөнгө салат. Биз аталган агенттик менен биргеликте алгачкы рейдди кечээ күнү өткөрдүк. Эми мындай рейддер күндө өткөрүлүп турат", — деди Оторов.
Ошондой эле ал айыпка жыгылган учурда жеке жактар 3000 сом, юридикалык тараптар 13 000 сом төлөрүн кошумчалады.
