БИШКЕК, 29-дек. — Sputnik. Өкмөт Кыргызстанга полиэтилен баштыктар менен пластик идиштерди киргизүүгө тыюу салууну сунуштап жатат.
Бул "Ысык-Көл" биосфералык аймагынын зонасынын чегинде полиэтилен пакеттерин жана пластик идиштерин ташып киргизүүгө, өндүрүүгө, сатууга жана пайдаланууга тыюу салуу жөнүндө" Кыргыз Республикасынын мыйзам долбоорунун негиздемесинде айтылат.
Анын демилгечиси Экмат Байбакпаев. Эл өкүлү аталган мыйзамды бузгандарды административдик, жазык жана материалдык жоопкерчиликке тартууну сунуштады.
"Бажы биримдигинин "Таңгактын коопсуздугу жөнүндө" техникалык регламентине ылайык, таңгактар ар кандай түрлөргө, анын ичинде полимердик деп бөлүнөт. Алсак, полимердик таңгактарга полимер материалдарынын ар кандай түрлөрү, анын ичинде полиэтиленден жасалган баштыктар кирет, ушуга байланыштуу мыйзамдын долбоорунун бүткүл тексти боюнча "полиэтилен пакеттери" деген сөздү "полимер плёнкаларынан жасалган пакеттер" деген сөздөр менен алмаштырууну сунуштайбыз", — деп айтылат документте.
Андан сырткары, мыйзам долбоору кабыл алынган учурда аны ише ашырууда кыйынчылыктар келип чыгышы мүмкүндүгү эскертилген.
Бүгүнкү күндө Кыргызстанда өзгөчө корголуучу 87 жаратылыш аймактары иш алып барат.
Ал жерлерди полиэтилен пакеттери жана пластик идиштери менен булгоо тобокелдиги бар.
"Буга байланыштуу республиканын бүткүл аймагында экологиялык коопсуздукту камсыз кылуу боюнча комплекстүү мамиле кылуунун зарылдыгы келип чыккан. Андыктан КРдин бүткүл аймагы боюнча полиэтилен пакеттерин жана пластик идиштерин ташып киргизүүгө, өндүрүүгө, сатууга жана пайдаланууга тыюу салуу маселесин кароону сунуштайбыз", — дешкен өкмөттөн.
Экологиялык коопсуздук демекчи, Sputnik Кыргызстан адис Эмил Шүкүровго таянып, Ысык-Көлдүн түбүндө желим таштандылардын жарым метрге жеткен катмары пайда болгондугун кабарлаган.
