БИШКЕК, 28-ноя. — Sputnik. Бокс боюнча дүйнөнүн жети жолку чемпиону Орзубек Назаровдун кызы кабылган жол кырсыгына айыпталып жаткан милиционер көрсөтмө берди.
Аталган иш боюнча сот отуруму бүгүн Биринчи май райондук сотунда өттү. Айып эки автоинспекторго коюлуп жатат. Алардын бири ошол күнү патрулдук унаа Чыңгыз Айтматов проспектисинин боюнда, Токтогул көчөсүнө жакын турганын айтып берди. Экипаждын ага инспектору аны "Оливье" кафесине абалды билүү үчүн жиберген.
"Бир аздан кийин ал мага чалып, жол кырсыгы болгон Чүй проспектиси менен Тоголок Молдо көчөсүнүн кесилишине келүүмдү айтты. 10-12 мүнөттөн кийин айтылган жерге такси менен келип, тез жардамдын эки унаасы жана бир нече патрулдук машинанын турганын көрдүм. Кырсыктын өзүнө күбө болгон жокмун, анткени машинада эмес болчумун", — деди ал.
Инспектордун айтымында, окуя болгон жерде кесиптеши экөө коомдук тартипти жөнгө салууга жардам берген, маалыматты башка экипажга кабарлап, мурунку жерине кайтып келишкен. Ал күнү айыпталып жаткандар шаардын Ленин районундагы жаңы конуштарды көзөмөлгө алмак.
Текшерүүдөн кийин прокуратура мотоциклдин артынан кызматтык унаасы менен эки милиционер куугунга түшкөнүн аныктап берген. Мындан улам жаштар ылдамдыкты күчөтүп, кырсыкка кабылган.
Назаров Ички иштер министрлиги өз кызматкерлери үчүн жоопкер экенин айтып, айып дал ушул мекемеге тагылышы керектигин белгиледи. Спортчу министрликтен 10 миллион сом талап кылууда.
