БИШКЕК, 26-ноя. — Sputnik. Минск шаарына улуу жазуучу Чыңгыз Айтматовго арналган эстелик таш коюлганын кабарчыбыз жеринен билдирди.
Аны ачуу салтанатына КР премьер-министри Мухаммедкалый Абылгазиев жана Белоруссиянын өкмөт башчысы Сергей Румас катышты.
Эстелик ташы жазуучунун атындагы паркка коюлду.
Абылгазиев белорус тарапка ырахматын айтып, кыргыз элинин атынан ыраазычылык билдирди.
"Айтматов атындагы парк эки элдин достугунун символу болот деп ишенем. Бул паркта Белоруссиянын жаш чыгармачыл элитасы убактысын өткөрөт деп ойлойм",- деди ал.
"Айтматов кыргыз элинин улуу уулу. Ал глобалдык масштабдагы талант, дипломат, гуманист, философ жана мамлекеттик ишмер болгон. Бардыгыбыз анын китептери менен чоңойдук",- деди ал.
Андан сырткары, январь айында Кыргызстан менен Белоруссия дипломатиялык байланыштын 25 жылдыгын белгилегенин кошумчалады.
Кыргызстандын делегациясы Минск шаарына дүйшөмбү күнү, 26-ноябрда келген. Шейшемби күнү Белоруссиянын борборунда ЕАЭБге мүчө мамлекеттердин өкмөттөр аралык кеңешинин жыйыны өтөт.
