БИШКЕК, 1-авг. — Sputnik. Фейктер менен күрөшүп баштаган Facebook жана Instagram 30дан ашуун аккаунтту өчүрдү. Бул туурасында Facebook компаниясынын билдирүүсүндө айтылды.
"Бүгүн Facebook менен Instagram тармагынан 32 аккаунтту өчүрдүк. Себеби алардын жалган, так эмес маалыматтарды улам берип турууга тартылганы маалым болду. Мындайларга Facebook уруксат бербейт. Биз кээ бир адамдар же уюмдар аккаунттардын чынжырчасын түзүп алып, башкалардын башын айлантып, такталбаган маалыматтарды таратышын каалабайбыз", — деп айтылат таратылган маалыматта.
Буга чейин америкалык жалпыга маалымдоо каражаттары Россияны Дональд Трамптын президенттик шайлоосуна социалдык тармактар аркылуу колдоо көрсөттү деп күнөөлөп, бирок далил табылган эмес. Тагыраагы, алар Санкт-Петербургдагы "Интернетти окуп-үйрөнүү боюнча агенттик" (Internet Research Agency) туурасында айтышкан.
Апрель айында Facebook социалдык тармагынын негиздөөчүсү Марк Цукерберг 270ден ашык баракча менен аккаунттун блокко алынгандыгын айткан жайы бар. Ал ишмердүүлүгү чектелген бир нече аккаунттар "россиялык маалымат уюмдарына" тиешелүү деген пикирин кошумчалаган. Facebook пикири боюнча, бул IRA тарабынан көзөмөлгө алынып турган.
