БИШКЕК, 26-июн. — Sputnik. Россияда өз жубайын өрттөп өлтүрүүгө шектелип кармалган Э.М. аттуу кыргызстандык жарандын күнөөсү азырынча далилдене элек. Бул тууралуу КРдин Россиядагы элчилигинен билдиришти.
Маалыматка караганда, элчилик менен КР өкмөтүнүн алдындагы Миграция кызматынын өкүлчүлүгүнүн кызматкерлери окуянын чоо-жайын билүү үчүн компетенттүү органдар жана оорукананын дарыгерлери менен жолугушкан.
"Тергөөчүнүн айтымында, аталган факты боюнча РФтин Кылмыш жаза кодексинин 105-беренесинин 1-бөлүгү боюнча кылмыш иши козголду. Ыкчам тергөө кызматкерлери менен биргеликте окуянын күбөлөрү суралып жатат. Айыпталуучу 48 саатка камалган болчу. Азырынча анын күнөөсү далилдене электигин адвокаты билдирди. Бүгүн, 26-июнда, шектүү туугандарынын катышуусунда кайрадан сурак берип, эртең баш коргоо чарасы тандалат", — деп айтылат маалыматта.
Ал эми маркумдун сөөгү эртең, 27-июнда, Санкт-Петербург — Бишкек каттамы менен мекенине жөнөтүлөт. Консулдук, диаспора жана ысык-көлдүк жердештери каражат жагынан жардам берген. Ошондой эле маркумдун төрт жаштагы экинчи баласын мекенине жөнөтүү боюнча туугандарына консультация берилген.
Эске салсак, 24-июнга караган түнү саат 2.30дар чамасында Ленинград облусунун Киров районундагы Шлиссельбург шаарында (Санкт-Петербург шаарынан 50 чакырым алыста) кыргызстандык келин азык-түлүк саткан дүкөндө 19 жаштагы кайниси менен иштеп жаткан учурда өрттөлгөн.
Белгисиз кишилер дүкөнгө өрт койгондо жигит качып чыгууга жетишкен. Учурда денесинин 80 пайызы күйүк алып ооруканада жатат. Ал эми келин ошол жерде жан берген. Полиция буга шектүү катары анын күйөөсүн кармаган.
