БИШКЕК, 19-июн. — Sputnik. Кафеде тамакка ыпыр-сыпыр кошуп акысын төлөбөй койгон милиция кызматкерлеринин окуясы боюнча Жол кыймылы коомпсуздугун камсыздоо башкы башкармалыгы билдирүү таратты.
Эскерте кетсек, социалдык тармакта ЖКККБнын формасын кийген адам акча төлөөдөн качып тамакка ыпыр-сыпыр кошуп салып, официантка догурунган видео тараган. Анда ЖКККБнын формасын кийген эркек кишилер кафеде тамак ичип отурганын көрүүгө болот. Бир маалда колундагы салфеткага оролгон нерсени тамакка салып туруп, официантты чакырат.
Башкармалыктын айтымында, маалымат чындыкка дал келбейт.
"Ысык-Көл облусу боюнча Жол коопсуздугун камсыздоо бөлүмүнүн кызматкерлери Боом капчыгайында жайгашкан кафенин биринен тамак ичкен. Тамактын акысы төлөнгөн, аны кафеден берилген чек тастыктап турат. Официанттар менен болгон кайым айтышууга борщтон табылган желим тасмалдын айрындысы себеп болгон. Андан тышкары, суусундук алып келип берүү өтүнүчүнө официант жооп бербей койгон", — деп айтылат билдирүүдө.
ИИМ видеону жайылтып жиберген Айбек Жаңыбаев аттуу колдонуучунун аталган тамактануучу жайга тиешеси болушу мүмкүндүгүн айтып, тарап жаткан маалыматтан улам кызматтык иликтөө башталганын кошумчалады.
