БИШКЕК, 9-апр. — Sputnik. Президент Сооронбай Жээнбеков расмий иш сапары менен Түркияга учуп кетти.
Өлкө башчы Анкара шаарында 9-10-апрель күндөрү болуп, анда эки тараптуу кызматташууларды бекемдөө боюнча сөз болот.
Тараптар ортосунда бир катар документтерге кол коюлмакчы.
Андан соң 11-апрелде өлкө башчы Бельгияга Евробиримдиктин институтуна барат.
Брюсселде Кыргызстан менен Евробиримдиктин ортосундагы кызматташуу боюнча жаңы макулдашуулар талкууланат. Андан сырткары, Кыргызстандын приоритеттүү делген тармактарына инвестиция тартуу боюнча кеп болот.
Жээнбеков Евробиримдиктин чет элдик иштер, саясат коопсуздугу боюнча жогорку өкүлү Федерико Могерини менен жолугат. Ошондой эле Еврокомиссиянын төрагасы Жан Клод Юнкер, Еврокеңештин төрагасы Дональд Туск жана Европарламенттин төрагасы Антонио Таяни менен да кезигиши пландалууда.
Жээнбековду коштоп кеткен делегаттардын тизмеси:
Эрлан Абдылдаев – тышкы иштер министри;
Данияр Сыдыков — президенттик аппараттын тышкы саясат боюнча бөлүмүнүн жетекчиси;
Ибрагим Жунусов – Кыргызстандын Түркиядагы элчиси;
Санжар Муканбетов – вице-премьер-министр;
Алмазбек Баатырбеков – Жогорку Кеңештин депутаты;
Акылбек Жаманкулов – Жогорку Кеңештин депутаты;
Артем Новиков – экономика министри;
Нурбек Мурашев — айыл чарба, тамак аш өнөр жайы жана мелиорация министри;
Теңизбек Абжапаров – социалдык фонддун жетекчиси;
Канат Аманкулов — жаштар иши, дене тарбия жана спорт боюнча мамлекеттик агенттиктин жетекчиси;
Эсенкул Момункулов — инвестицияларды илгерилетүү агенттигинин жетекчиси.
Өлкө башчы Кыргызстанга 12-апрелде келет.
