БИШКЕК, 1-апр. — Sputnik. Кыргызстандык авиакомпания Россиядан жаңы үлгүдөгү эки учак сатып алууну көздөп жатат. Бул тууралуу Кыргыз-орус мамлекеттер аралык комиссиясынын жыйынында вице-премьер Аркадий Дворкович айтканын РИА Новости жазды.
"Sukhoi Superjet 100 үлгүсүндөгү учактар боюнча сүйлөшүүлөр жүрүп жатат. Учактарды алуу боюнча техникалык жана каржылык маселелерди такташыбыз зарыл. Негизи заводдон жаңы чыккан эмес, бир аз учуп калган учактарды берели деп жатабыз. Анткени алар текшерүүдөн өтүп бүтүштү. Ал эми келечекте "МС-21" аба кемесин дагы алса болот. Өнөктөштөрүбүз анын дагы атаандаштыкка жакшы туруштук берерин түшүнөт деп ишенем", — деди Дворкович.
"Коммерсант" басылмасы жазганына караганда, учак алууну "Эйр Кыргызстан" авиакомпаниясы пландап жатат.
Sukhoi Superjet 100 (SSJ100) — Россияда чыгарылган жүргүнчү ташуучу учак. Бортуна 98ге чейин жүргүнчү батырган аба кемеси болжол менен 4,4 миң чакырымга жете алат. Биринчи жолу абага 2008-жылдын май айында көтөрүлгөн. Ал эми жүргүнчү ташуу боюнча каттамдар 2011-жылы аткарыла баштаган.
"МС-21" — 150-211 жүргүнчүнү батырган перспективдүү учак. Ал "Ту", "Як" жана "Ан" сыяктуу советтер союзунун учактарынын ордуна басат. Буга чейин "Иркут" компаниясы алгачы учак 2018-жылы чыгырыларын кабарлаган.
Эске салсак, "Эйр Кыргызстан" авиакомпаниясы 2017-жылдын ноябрь айында каттамдарын токтоткон. Буга компаниянын жалгыз учагы ремонтко туруп калганы себеп болгон.
