Каракчылардын талоонунда калган Болот Шамшиев, 40 тонна темирди Кытайга сатып жиберген депутат. Редакция өлкө аймагында чейрек кылым мурда катталган кылмыштарды сунуштайт.
Жалал-Абаддагы аткаминерлер 1,5 тонна кант уурдап…
Жаратылыш кырсыгынан жабыркаган кыргызстандыктарга Түркиядан ар жылы ири көлөмдөгү гуманитардык жардам келген. Бөлүштүрө келгенде Жалал-Абаддын үч аткаминери 1,5 тоннадан ашык кантты жок кылышкан. Кийин алардын былыгын укук коргоо кызматкерлери таап чыккан.
Кыздарды курутуп…
Борбор калаада кыз-келиндерди алдап, эл жок жерге алып барып тоногон кылмышкерди милиция эки жылдан ашык убакыт издеген. Шектүү жабырлануучуларга бычак, мылтык такап, акча жана зер буюмдарын алып из жашырып кетчү. Кыздардын айрымдарын күч колдонуп, чечинткен учурлар да болгон. кылмышкер колго түшөөр алдында эл ташып күн көргөн улгайган айдоочуну башка атып өлтүргөн.
Малды жүздөп "сугунган" жетекчи
Баткен облусундагы айылдардын бириндеги мал чарба кооперативинин төрагасына кылмыш иши козголгон. Кооперативдин башчысы ишканадан өзүнө 69 баш койду менчиктеп, 205 баш жаш козуну каттатпай, өзүнүн пайдасына жымырып алууну көздөгөн. Бирок, тилеги таш капкан.
Атасын жыга чапкан мыкаачы
Үйдө арак ичип отурган ата-баланын ортосунда уруш чыгып, бири-бирине кол көтөрүүгө чейин жетет. Алдуураак болгондуктанбы, айтор 30 жаштагы уул атасын күрөк менен жыга чаап салган. Улгайган киши окуя болгон жерде көз жумган.
Кадимки Болот Шамшиев сабап…
Үч кылмышкер жеңил акча табуу максатында кечкурун атактуу режиссер Болот Шамшиевди үйүнүн жанынан аңдып туруп, унаа токтотуучу жайга келгенде ага кол салышкан. Бет кап кийгендер Шамшиевди коркутуп, 200 миң доллар талап кылышкан. Жанынан акча таба албай койгон жигиттер аны ур-токмокко алып, андан соң качып кетишкен.
Кытайга темир саткан депутат
Кытайга мыйзамсыз жөнөтүлгөн 40 тонна темир жана 21 миң даана тамеки укук коргоо органдары тарабынан аныкталып колго түшүрүлгөн. Жасалма документтер менен жиберилген товардын жалпы баасы 1,5 миллион рублду түзгөн. Мыйзамсыз мындай иштин башында эл өкүлү — облустук кеңештин депутаты турган.
Маалыматтар 1993-жылы чыккан гезиттерден алынды.
Sputnik Кыргызстан агенттиги даярдаган февраль айындагы оозду ачырган соттук чечимдерди окуңуздар.
