БИШКЕК, 14-дек. — Sputnik. Өзбекстан кыргызстандык ишкерлерге насыя иретинде 100 миллион доллар каражат бөлөрүн КРдин Экономика министри Артем Новиков билдирди.
Мындай келишимге президент Сооронбай Жээнбековдун Ташкент шаарына болгон иш-сапарынын алкагында кол коюлду.
"Бул насыялар Өзбекстандын продукцияларын импорттой турган ишкерлерге Кыргызстандын коммерциялык банктары аркылуу берилет", — деди Новиков.
Белгилей кетсек, 13-декабрь күнү Ташкент шаарында 300дөн ашуун кыргыз-өзбек ишкерлери катышкан соода-экономикалык сессия өттү. Анда биринчи жолу өкмөт менен ишкерлер бет маңдай отуруп, бийлик өкүлдөрү бизнесмендердин суроолоруна жооп беришти.
Ошондой эле өзбек өкмөтү өз өлкөсүнүн аймагында кыргызстандык ишкерлерге тиешелүү финансылык операцияларга тоскоолдук жана чектөөлөр болбой турганын тастыктаганы айтылды.
