Бишкекте милиция кызматкерлери айдоочунун машинасын арыктан чыгарып беришти

БИШКЕК, 5-дек. — Sputnik. Милициянын үч кызматкери арыкка дөңгөлөгү түшүп кеткен автоунанын ээсине жардамдашып, айдоочунун алкышына арзыды.

Шаар тургуну Самат Токтоболотов социалдык тармакка жазгандай, окуя 5-декабрда Манас проспектиси менен Токтогул көчөлөрүнүн кесилишинде саат 10:00дөр чамасында болгон.

"Арыкты байкабай ага дөңгөлөгүм түшүп кетти. Машина катуу отуруп калгандыктан, ордунан козгой албай койдум. Эми эмне кылсам, эвакуатор чакырып же кишилерден жардам сурасамбы деп калдым", — деп жазды ал.

Токтоболотов Sputnik Кыргызстан агенттигине билдиргендей, окуя болгон жерге келип калган милиционерлер кол кабыш кылган.

"Чынында күткөн эмесмин. Машинаны оңой эле чыгарып алдык. Рахмат айтайын дегиче эле алар машинасына түшүп кетип калышты. Эптеп сүрөткө тартып калдым. Акча берейин десем болбой коюшту. Жок дегенде силердин сүрөтүңөрдү интернетке чыгарайын деп сурадым. Жакшы адамдар бар экенин башкалар дагы билиши керек да", — деди ал.

Милиционерлер аттарын атаган эмес. Бирок сүрөткө түшүп калган машинанын номери MVD 344 M экенин көрүүгө болот.

Шаар тургуну жардам берген милиция кызматкерлерине алардын жетекчилиги ыраазычылык билдирип коюшса деп суранат.