БИШКЕК, 3-дек. — Sputnik. Мурдагы муфтий Чубак ажы Жалилов милицияга сурак берди. Бул тууралуу анын жактоочусу Акин Токталиев билдирди.
Анын айтымында, милиция Жалиловду Чолпон-Атадан дарыланып жаткан жеринен алып келген.
"Чубак ажы Чолпон-Атадагы санаторийлердин биринде дарыланып жаткан жеринен Бишкекке милициянын коштоосунда алып келинди. Сурак 2-декабрда болуп саат 9.00дөн 15.00гө чейин, алты саатка созулду", — деди ал.
Токталиев милиция Чубак ажыны прокуратуранын көрсөтмөсү боюнча суракка алганын айтып, башкы көзөмөл органына айрым депутаттар арыз менен кайрылганын кошумчалады.
Ал эми милиция сурак боюнча кийинчерээк толук маалымат берилет деп ишендирди.
Бул боюнча Чубак ажы Жалиловдун өзү менен байланышып, пикирин билүүгө мүмкүн болгон жок.
Белгилей кетсек, Аалымдар кеңешинин мүчөсү Чубак ажы Жалилов экинчи аял алганын ачыктагандан кийин коомчулукта катуу талкуу жаралган. Айрымдары буга дин уруксат берерин жүйө келтирсе, кээси "мыйзамды аттап өттү" деп укуктук баа берүү үчүн прокуратурага кайрыларын билдиришкен.
