ОШ, 30-ноя. — Sputnik. Ош шаарынын борбордук аянтында Ош, Жалал-Абад жана Баткендин дыйкандары жалпы баасы 83 миллион 353 миң 829 сомду түзгөн 57 даана жаңы айыл чарба техникасын тапшыруу аземи өткөнүн жеринен кабарчы билдирди.
Техникаларды тапшыруу иш-чарасына айыл чарба, өнөр жай жана мелиорация министри Нурбек Мурашев, өкмөттүн Ош облусундагы ыйгарымдуу өкүлү Таалайбек Сарыбашев, Ош шаарынын биринчи вице-мэри Замирбек Аскаров жана өкмөттүн Баткен менен Жалал-Абад облустарындагы өкүлчүлүгүнүн кызматкерлери катышкан.
"Дыйкандарга 57 даана айыл чарба техникасынын ачкычы тапшырылды. Бул аракеттердин бардыгы "Мал чарбасын жана рынокту өнүктүрүү" долбоорунун алкагында ишке ашты. Аны АРИС менен Айыл чарба министрлиги колдоого алган", — деп айтылат маалыматта.
Долбоорду ишке ашырууга, андан сырткары, Айыл чарбаны өнүктүрүү эл аралык фондусу да каражат жагынан колдоо көрсөткөн. Анын башкы максаты дыйкандардын ишмердигин колдоо болуп саналат. Бул долбоордун алкагында түштүк аймактагы дыйкандарга жалпы баасы 446 миллион 992 миң 800 сомду түзгөн 173 айыл чарба техникасы берилет.
