БИШКЕК, 27-ноя. — Sputnik. "Тазалык" ишканасынын кызматкерлери менен кар тазалоочу атайын техника бүгүнтөн тарта калаанын көчөлөрүнө чыгып ишке киришти. Бул тууралуу мэриянын маалымат кызматы кабарлады.
Билдирүүгө ылайык, шаардын көчөлөрүн тазалоого 569 көчө шыпыргыч, 105 жүк ташыгыч, 53 жашылдандыруу жумушчулары жана 47 атайын техника чыккан.
"Быйыл борбор калаанын жолдорун кардан тазалап туруу үчүн 34 унаа кызматта болот. Анын ичинде 20 кар тазалоочу, эки кум себүүчү унаа, эки кар тазалаган трактор, щетка жана калагы менен төрт трактор, МТЗ-80 үлгүсүндөгү эки трактор, УКМ-2500 үлгүсүндөгү төрт унаа жана 40 жеңил унаа иштейт. Мындан сырткары, аялдама жана тротуарлардагы карды тазалаш үчүн 578 көчө шыпыргыч менен 113 жүк ташыгыч иштемекчи", — деп айтылат маалыматта.
Эске салсак, "Тазалык" ишканасынын директору Рыспек Сарпашев былтыркы жылдан 11 миң тонна кум жана 877 тонна туз артканын айтып, баарын кошуп эсептегенде Бишкек быйылкы кышка толугу менен даяр экенин баса белгилеген.
