БИШКЕК, 13-ноя. — Sputnik. Японияда көчө мышыгы Кумамото префектурасынын 82 жаштагы тургунун өлтүрдү деп "шектелүүдө". Бул тууралуу РИА Новости жазып чыкты.
Маалыматка ылайык, бети-башы тытылган кемпирдин сөөгүн алгач кызы көргөн.
"Биз аны тапканыбызда бети-башы аябай канжалаптыр. Эмне болгонун азыркыга чейин түшүнбөй жатабыз", — деди өлгөн кемпирдин кызы.
Полиция бул ишти иликтөөгө алып, бирок кемпирге кол салууга шектелген кандайдыр бир адамдардын үйгө кирип же чыкканын аныктай алган эмес.
Андан соң алар пенсионердин бетиндеги тытылган жарааттар мышыктын тырмагынын издери экенин байкашкан. Жергиликтүү ЖМКлардын маалыматында, полиция кызматкерлери "кылмышка шектүү" мышыкты табышкан. "Кармалган" көчө мышыгынын тырмагындагы кандын үлгүсү экспертизага жөнөтүлүп, жыйынтыгы күтүлүүдө.