НАРЫН, 12-ноя. — Sputnik. Экологиялык техникалык инспекциясынын Нарын аймактык башкармалыгы Германия жаратылышты коргоо уюмунун (НАБУ) Барс ыкчам отряды жана Нарын ОИИБдин ыкчам тобу браконьерлерге каршы рейд жүргүзүштү. Бул тууралуу аймактык кабарчы билдирди.
Каратал-Жапырык жаратылыш коругунун Соң-Көл аймагын текшерүүдө мыйзамсыз аң улоочулар кармалышты.
"Алардын жанынан жаңы атылган тоо текенин мүйүзү, 4 суурдун, 1 түлкүнүн териси, 5 капкан, документи жок мылтык алынды. Ал эми Соң-Көлдөн 2800 метрдей балык кормоочу торлор жана 50 даана сига балыгы, 5 кайыктын мотору алынып, актылар түзүлдү", — деп айтылат маалыматта.
Жыйынтыгында балык кармоочу торлор өрттөлүп, материалдар облустук прокуратурага тергөө үчүн өткөрүлүп берилген.
Мындай биргелешкен пландуу текшерүүлөр уланат.
