БИШКЕК, 9-ноя. — Sputnik. Жыл башынан берки 10 ай аралыгында Кыргызстандын жолдорунда 695 киши каза тапканын маалымат жыйын учурунда Кайгуул милиция башкы башкармалыгынын жетекчи орун басары Ыманалы Саркулов билдирди.
Анын айтымында, 2016-жылдын ушул маалында 771 адам көз жумган, башкача айтканда, кырсык көрсөткүчү 9,8 пайызга азайган.
Ал эми быйылкы жылдын башынан бери октябрь айына чейин 5 197 жол кырсыгы катталып, андан 7 839 адам жабыркаган.
"Авариянын 33,8 пайызы катуу ылдамдыктан болот. Каршы тилкеге чыгып, ашып өтүү эрежесинин бузулушу жалпы жол кырсыгынын 14,4 пайызын түзөт. 20 пайызы айдоо эрежесин сактабагандыктан жаралса, айдоочунун мас абалда рулга отурушу жалпы сандын 8,6 пайызын түзөт", — деди Саркулов.
Маалымат жыйын Sputnik Кыргызстан агенттигинин мультимедиалык борборунда өттү.
