БИШКЕК, 30-авг. — Sputnik. Теракт коркунучунан улам милиция Бишкектеги унааларды текшерүүгө алып жатат. Бул тууралуу Sputnik Кыргызстан агенттигинин кабарчысына Кайгуул милиция башкармалыгынан кабарлашты.
Ошол эле күнү Улуттук коопсуздук комитети теракт коркунучу күчөп жаткандыктан жарандарды сак болууга чакырган. Чекисттер коркунуч эл аралык террордук уюмдар тарабынан болуп жатканына ишенип жатышканын белгилешкен.
Редакцияга окурман кайрылып, 30-августка караган түнү Кайгуул милициясы анын унаасын тинтүүгө алып, документтерин текшергенин билдирди.
"Тартип сакчылары чындап эле документтерди жана унаанын салонун текшерип жатышат. Бул аракеттер коомчулуктун коопсуздугун сактоо үчүн жасалууда", — деп милициядан билдиришти.
Саркуловдун Sputnik Кыргызстан агенттигине билдиргенине караганда, рейд 21-августта башталып сентябрдын башына чейин уланат. Мындай чаралар эгемендүүлүк күнү менен окуу жылынын башталышына да байланыштуу.
"Кайгуул милициясынын кызматкерлери унааларды токтотуп текшерүүгө алса, жөө кайгуулчулар коомдук жерлердеги күмөн жараткан предметтерге көңүл бурушат. Кандай унаалар менен нерселер күмөн жаратышы мүмкүн экенин алдын ала айтуу кыйын. Бул адамдардын жүрүш-турушуна байланыштуу болот", — деди Саркулов.
Кийин "Перехват" планы жарыяланып, шектүүлөр издөөгө алынган. Машина Көк-Жар конушундагы Кулмырзаев көчөсүнөн табылып, анын ичинен китептер жана уюлдук телефон алынган. Шектүүлөр качып кетип, кийин 28-августта Спорт сарайынан кармалышкан.
Ал эми 29-август күнү Жайылда атайын операция өтүп, террорчу делген эки киши жок кылынган. Атышуу учурунда алардын дагы бири жаракат алып, ооруканага жеткирилген.
