БИШКЕК, 18-авг. — Sputnik. ИИМдин Кайгуул милициясынын башкы башкармалыгы терактылар кооптуулугунан улам өлкө аймагында рейд өткөрөт. Бул туурасында Sputnik Кыргызстан агенттигине Кайгуул милициясынын башкы башкармалыгынын жетекчисинин орун басары Ыманалы Саркулов билдирди.
Буга чейин Улуттук коопсуздук боюнча комитети өлкөдөгү терактылар кооптуулугунан улам элди кыраакы жана сак болууга чакырган. Буга эл аралык террордук уюмдардын аракеттери себепкер болууда.
"Кайгуул милициясы шек жараткан автоунааларды текшерет. Ал эми жөө кайгуулчулар коомдук жайга ташталган шектүү буюмдарды карайт. Кандай автоунаалар менен айдоочулар текшерилээрин конкреттүү түрдө айтуу кыйын. Бул алардын тартибине жараша болот. Бул иш-чара боюнча тажрыйбалуу делген бардык инспекторлор атайын окуудан өттү ", — деди Саркулов.
Анын айтымында, рейд 21-августтан сентябрдын башына чейин уланат. Иш-чара Кыргызстандын эгемендүүлүк күнүнө жана окуу жылынын башталышына да багытталган.
