БИШКЕК, 26-июл. — Sputnik. Бостери айылындагы пляжда параплан менен учуп бараткан бир кыз жана инструктор кулап, бакка илинип калышканын Sputnik Кыргызстан агенттигине окуяга күбө болгон жаран WhatsApp канал аркылуу билдирди.
Анын айтымында, парапландын коопсуздук тросу иштебей, ал бак жыш өскөн жакка учуп кеткен.
"Кайык жээкке токтогондо парапланды ылдый түшүрүү керек болчу. Бирок бир нерсеси туура эмес болуп калды окшойт, жерге түшүрүлө элек кишилерди парашют бактар жакка учуруп кетти, алар үч метр бийиктикте өскөн дарактын бутактарына илинип калышты. Баарыбыз коркуп кеттик", — деп жазган күбө.
"Аз жерден мушташ чыгып кете жаздады. Кер-мур айтыша кеттик, мындайды көз жаздымда калтырбаш керек да. Дагы жакшы, iPhone аппаратында өчүрүлгөн сүрөттөрдү калыбына келтирүүчү функция бар экен. Биз айткандарыбызды толук далилдей алабыз. Элестетсеңер, парапландагылардын жерге кулап түшүп, катуу урунушу мүмкүн болчу да. Демек, мындай аттракциондорго түшкөн ар бир эле киши өмүрүн тобокелге салат экен да", — деген окурман.
