БИШКЕК, 23-июл. — Sputnik. Ичеги-карынына операция жасалган үч жашар Айназик Турдубекова каза болуп калгандыгы тууралуу ыктыярчы Зульфира Хайбуллина Facebook баракчасы аркылуу кабарлады.
Айназиктин операциясына каражат топтоо иштери ушул жылдын февраль айында башталган. Боорукер адамдар көп болгондуктан бир күндүн ичинде эле керектүү 600 миң сом акча топтолуп калган. Наристе кызды Москвадан операция жасатып, андан соң үй-бүлөсү Бишкекке келген.
"20-июль күнү саат 4:00дө арабыздан Айназикти шум ажал алып кетти. Ал күчтүү дарыларды көп ичкендиктен боору иштебей калган. Ал өмүрүнүн акыркы айларын үйүнөн, жакындарынын жанында өткөрдү. Наристе кыздын өмүрү үчүн күрөшкөн бардык адамдарга ыраазычылык билдиребиз. Анткени биз ага кичине болсо да өмүр тартуулай алдык", — деп ыктыярчы өзүнүн социалдык баракчасына жазган.
Айназик дарыланган шаардык ооруканада анын өлүмү тууралуу маалыматты тастыкташты.
