БИШКЕК, 18-июл. — Sputnik. Улуу Британиянын Эл аралык өнүктүрүү министрлиги жана БУУнун Балдар фонду кыргыз өкмөтү менен биргеликте жаштар үчүн социалдык ынтымакты түзүү жана зомбулукту алдын алуу боюнча программа сунуштап жатат. Бул тууралуу атайын маалымат жыйын учурунда маалымдалды.
Суммасы 2,5 миллион АКШ долларын түзгөн төрт жылдык программа Баткен, Жалал-Абад облустарындагы чек арага жакын аймактарга, Ысык-Ата жана Караколдо ишке ашырылат.
Долбоор балдар укуктарын маалымдоого, теңсиздикти, чыңалууну, жаңжалдарды алдын алып, ынтымакка чакырууга багытталган.
Аталган программа мектепке чейинки билим берүү мекемелерине жана мектептерге жайылтылат. Ошондой эле өспүрүмдөргө жана жаштарга психологиялык жана юридикалык жактан адистештирилген жардам берилет.
