БИШКЕК, 17-июл. — Sputnik. Түрк авиакомпаниясы Дача айылынын жабыркаган тургундарына жөлөк пул төлөйт. Бул тууралуу маалымат жыйында өзгөчө кырдаалдар министри Кубатбек Боронов билдирди.
Ал ошондой эле кыргызстандыктар тарабынан чогултулган 100 миллион сомдон ашык каражат жабыркагандар менен каза болгондордун жакындарына бөлүнүп бергенин маалымдады.
"Жакын арада түрк тараптан дагы акча келип түшөт. Жөлөк пулдун көлөмү бардык тарапты канааттандырат, бул боюнча келишим бар. Биз июль айынын аягына чейин (болбой калса августтун соңуна чейин) бул иштерди аягына чыгарабыз", — деди Боронов.
Белгилей кетсек, 16-январда эртең менен саат 7:30дө Түркиянын ACT компаниясына таандык жүк ташуучу учак кулап, 39 кишинин өмүрүн алган. Кырсыктын чоо-жайын КМШ мамлекеттер аралык авиациялык комитети иликтөөдө.
