Кыргызстанда бала асырап алгысы келген жарандардын тиешелүү документтери толук болуп, жакшы шартта жашоосу керек. Бул тууралуу Sputnik Кыргызстан агенттигине Эмгек жана социалдык өнүктүрүү министрлигинин үй-бүлө жана балдарды коргоо башкармалыгынын башкы адиси Гүлзина Бообекова билдирди.
Анын айтымында, бала асырап алчу адамдар бул ишке өтө жоопкерчиликтүү мамиле жасоосу кажет.
"Көпчүлүк адамдар бала багып алуудагы процесс татаал документ экен деп нааразы болушат. Биринчиден бала асырап алуу чоң жоопкерчилик, анын да өзүнүн жол-жоболору болот. Биз дагы талаадагы, ишеничке кирбеген адамга баланы дароо карматып кое албайбыз. Ал үчүн тиешелүү документтерди топтоп, кезекке туруусу кажет. Быйыл өлкөдө бала багып алууга кезекте 217 кыргызстандык, 91 чет элдик жаран турат", — деди Бообекова.
Эмгек жана социалдык өнүктүрүү министрлигинин маалыматы боюнча бир жылда өлкөдө 1000ден ашуун бала ата-энелүү болот.
