БИШКЕК, 27-июн. — Sputnik. Чүй облусуна караштуу Беловодское айылындагы көп кабаттуу беш үйдүн тургундары эки айдан бери таза суусуз отурат. Бул тууралуу Sputnik Кыргызстан агенттигине жергиликтүү тургундар билдиришти.
Алардын айтымына караганда, суу көйгөйү өткөн жылдын декабрында эле башталган. Таза суу бирде берилсе бирде берилбей, жашоочулардын айласын алты кетирген. Ал эми акыркы айларда суу такыр эле токтоп калган. Жергиликтүүлөр буга жаңы жатаканага кошулган суу түтүгү себеп болушу мүмкүн экенин айтышууда.
"Айрымдар үчүн желим баштыктар ажаткананын ордуна кызмат кылып жатат. Кээ бирлери сыртка чыгып келишет. Ар бир подъездде жагымсыз жыт орноп турат. Сууну унаа жуучу жайдан же жакынкы мектептен ташып жатабыз. Кээде кечкисин тамчылаган крандан эптеп бир чака суу толтуруп алабыз", — деп айыл тургундары нааразылыгын билдиришти.
Алардын айтымында жергиликтүү органдарга кайрылуулардан майнап чыкпай келет. Мындан улам жашоочулар коомчулуктун көңүлүн буруу үчүн Youtube каналына көйгөйдү чагылдырган видео жүктөшкөн.
Видеодо Улуу Ата Мекендик согуштун 101 жаштагы ардагери дагы суусуз отурганы көрсөтүлгөн.
