БИШКЕК, 31-май — Sputnik. Кыргызстанда 31-май күнү чын эле катуу шамал болору күтүлүп жатат. Бирок Бишкек шаарында көз ачырбаган шамал тууралуу маалымат чындыкка дал келбейт. Бул тууралуу Sputnik Кыргызстан агенттигинин кабарчысына ӨКМден кабарлашты.
Окурмандар редакцияга Whatsapp каналы аркылуу кайрылып, Бишкекте Москвадагыдай бороондуу шамал катталат делген маалыматты текшерип берүүнү өтүнүшкөн.
Эскерте кетсек, 29-майда Россиянын борборунда бороондон улам 16 киши каза болуп, 200 адам жаракат алган.
"Мэриядан бүгүн түнү катуу бороон болору тууралуу билдирме келип түштү. Анда шамал Москвадагыдан да катуу болоору айтылган. Ошондой эле терезелерди жаап, унааларды дарактардын жанына токтотпоо эскертилген", — деп окурмандар билдиришти.
Бишкек шаардык мэрия мындай маалымат таркатпаганын белгиледи.
"Синоптиктер Кыргызстандын ар кайсы аймактарында күтүлүп жаткан шамалдын ылдамдыгы секундасына 20 метрге чейин жетиши мүмкүндүгүн билдиришти. Бирок Москвадагыдай бороон күтүлүп жаткандыгы тууралуу маалымат чындыкка дал келбейт", — деп ӨКМден белгилешти.
29-май күнү Бишкекте болгон шамалдын ылдамдыгы секундуна 22 метрге жеткен. Анын айынан бир нече дарак кулап, чатырлар учкан.
