БИШКЕК, 30-май — Sputnik. Кечээ, 29-майда Чүй, Талас облустары менен Бишкек шаарында катуу шамал катталган. Учурда Жарандык коргонуу комиссиясы жеринде тактоо иштерин жүргүзүп жатат.
Ал эми Бишкек шаарынын мэриясы катуу жааган жаандан улам дарактар кулашы ыктымалдыгын эскертти.
Белгилей кетсек, Бишкек шаарында 19:15тер чамасында ылдамдыгы секундасына 25 метрге жеткен шамал болуп, айрым бактар кулаган. "Жеңиш" паркы жакта жол четинде токтоп турган жол тандабасты бак басып калган. Андан сырткары, шамал Hyatt мейманканасындагы трансформатордун чатырын учуруп, ал жеңил унаанын үстүнө түшкөн.
Айрым окурмандар борбор калаанын башка аймактарында да бактар кулаганын билдиришкен.
Чүй, Талас, Бишкектеги шамал
Ал эми Талас облусунда ылдамдыгы секундасына 25 метрге жеткен шамал болуп, бактыга жараша, эч ким жабыркабаганын ӨКМдин маалымат кызматы билдирди.
Эки күн мурун болгон шамал
Жалал-Абад облусунун Токтогул районунун аймагында 28-майда чак түштө 11:00дөн 12:00гө чейин ылдамдыгы секундасына 23 метрге жеткен шамал болгон. Анын кесепетинен үйдүн жана райондук борбордук оорукананын операциялык бөлүмүнүн чатырын шамал алып кеткен.
Ушундай эле катуу шамал Ала-Бука районунда саат 10:00дөр чамасында катталып, Ак-Там айылынын тургундарына бир катар чыгымдарды алып келген. Атап айтканда мөмө-жемиш кургатуучу бастырманын үстүн шамал алып кеткен. Андан сырткары, Жапа-Салды айылындагы сарайдын чатырын учурган.
Сузак районунун Курманбек айыл аймагында ылдамдыгы секундасына 15 метрге чейин жеткен шамал болуп, Кара-Чолок айылында эки кабаттуу үйдүн чатыры учуп кеткен. Ал эми З.Тайгараев айыл аймагындагы Кызыл-Суу айылында 11 турак жайдын 30 даана шиферин жана 11 сарайдын чатырын шамал алып кеткен.
Ушундай эле катуу шамал 28-майда саат 13:30дан 16:30дарга чейин Нарын облусунда да катталды.
Шамалдын ылдамдыгы Жумгал районунда 23-28 метрге чейин жетип, алты турак жай менен бир мектептин чатырын учурган.
Кочкор районунда шамалдын ылдамдыгы секундасына 20 метрге чейин жетип, бир үй менен мектептин чатырын алып кеткен.
Нарын районунда болгон шамалдын ылдамдыгы 17-20 метрге жеткен. Анын кесепетинен эки үйдүн, бир дүкөндүн жана маданият үйүнүн чатырлары кулаган.
Ак-Талаадагы шамалдын ылдамдыгы секундасына 18-20 метрге жетип, 25 турак үйдүн чатырын алып кеткен.
Ат-Башы районунда да 18-20 метрге жеткен шамал болуп, бир кампанын чатырын учурган.
Өкмөттүн токтомуна ылайык, Нарын облусу тоолуу район болгондуктан шамалдын ылдамдыгы секундасына 35 метрге жеткенде өзгөчө кырдаал киргизилет.
