БИШКЕК, 30-май — Sputnik. Кыргызстандын Тышкы иштер министрлиги Москвадагы бороондун кесепетинен каза болгондордун арасында КР жарандарынын бар-жогун текшерип жатат. Бул тууралуу аталган мекеменин маалымат кызматы билдирди.
Эскерте кетсек, Москвадагы нөшөрлөгөн жаан менен коштолгон катуу шамал кеминде 11 адамдын өмүрүн алып, бир топ зыян алып келген. Жүздөгөн бак кулап, унаалар кыйрап, жол кыймылы токтогон.
Дарыгерлер Подмосквьеде темир тунуке бир адамды өлтүрө басып калганын, дагы бир киши "Университет" метросунун жанынан кулаган бак алдында калып каза болгонун маалымдашты.
Калган маркумдар эмнеден көз жумганы учурда такталып жатат. Ушу тапта катаал аба ырайынан 150 адамдын жараат алганы айтылууда. 108 киши ооруканага түшсө, анын 22си балдар экени белгилүү болду.
