БИШКЕК, 24-май — Sputnik. Жайыл райондук сотунда жол кырсыгына байланыштуу 51 административдик материал табылбай жатканын Башкы прокуратуранын маалымат кызматы билдирди.
Прокуратура жол кырсыктары көбөйгөндүктөн мас абалында машина айдаган айдоочуларга карата Чүй облустук сотунун чыгарган чечимдерин текшерген. Ага ылайык, Жайыл райондук сотунун кызматкерлери Кайгуул милициясынан келип түшкөн 51 материалды өндүрүшкө алып, каттаган эмес.
Бул материалдар соттун канцеляриясынан да табылган эмес. Башкы прокуратура күнөөлүү кишилер административдик жоопкерчиликке тартылганын билдирди.
Аталган факты боюнча облустук прокуратура тарабанын Кылмыш жаза кодексинин 166-беренеси "Алдамчылык", 304-беренеси "Кызмат абалынан кыянаттык менен пайдалануу" жана 348-беренеси "Документтерди, штамптарды, мөөрлөрдү уурдоо, жок кылуу же жашыруу" боюнча кылмыш иши козголду.
Тергөө амалдары жүрүүдө.
