БИШКЕК, 23-май — Sputnik. Ички иштер министрлиги ата-энелерге кайрылып, 25-май күнү өлкө аймагында өтүүчү Акыркы коңгуроого арналган иш-чара учурунда балдарга сак болууга чакырды. Бул тууралуу өкмөттүн маалымат кызматы билдирди.
Маалыматка ылайык, бул күнү коомдук тартипке ички иштер органдарынын 4000ден ашуун кызматкери көз салат.
Республика боюнча укук коргоо органдарынын ар бир бөлүмүндө салтанаттуу иш-чараны көзөмөлдөө жана коомдук жайларга бүтүрүүчүлөрдүн массалык кирүүсүн текшерип, мониторинг жүргүзүү боюнча штабдар түзүлөт. Сейил бактарында, эс алуу жайларында ыкчам жөө жүргөн милиция кызматкерлери тартылып, алардын ар бири өздөрүнө бөлүнгөн аймактардагы коопсуздукту жеке жоопкерчилигине алышат.
"Акыркы коңгуроого арналган иш-чараларды өткөрүүдө балдардын жүргөн жерин жана өзгөчө кечки убакта алардын унаа башкаруусуна жол бербөө жана көзөмөлгө алуусу үчүн ата-энелерге кайрылабыз", — деди ИИМдин өспүрүмдөрдүн ишин текшерүү бөлүмүнүн башчысы Азамат Абдрахманов.
Ал эми Билим берүү жана илим министрлигинин маалыматы боюнча салтанаттуу иш-чаралар республика боюнча саат 9.00дөн 13.00гө чейин мектептердин аймагында гана өткөрүлөт.
Быйыл 9-классты аяктагандардын саны 92 миң, ал эми 11-класстын бүтүрүүчүлөрү 62 миңди түзөт.
