Милициянын кашын жара тепкен Алтынай Жайнаковага козголгон кылмыш ишинин негизинде соттук отурум болуп, чечим чыгарылганын Ош облустук сотунун басма сөз катчысы Бекзат Осмонкулов маалымдады.
"Ош облустук соту ырчы Алтынай Жайнакованы бейбаштык жасап, бийлик өкүлүнө күч колдонгону үчүн шарттуу түрдө төрт жылга эркинен ажыратты", — деди Осмонкулов.
Эскерте кетсек, 13-январга караган түнү саат 02.10дор чамасында Ош шаарынын Кайгуул милициясы шаардын Масалиев жана Абдыкадыров кѳчѳлѳрүнүн кесилишинде Honda Accord үлгүсүндѳгү автомашинаны алыскы чырактарын жандырып келе жаткан учурда токтоткон. Окуядан чыр чыгып, айдоочу кыз милиция кызматкеринин кашын жара тепкен.
Ош шаардык соту бейбаштык беренеси менен ырчыга 30 миң сом жана мас абалда унаа айдаганы үчүн 20 миң сом айып салган. Кийин жабыркаган тарап Ош облустук сотуна арыз менен кайрылган.
